Станіслаў Шушкевіч: Давайце змагацца не за абстрактныя «выбары», а за рэальных палітвязняў
Беларусам трэба браць прыклад з польскай «Салідарнасці».
– У Беларусі выбараў няма, – нагадаў Станіслаў Шушкевіч. –Ёсць палітвязні, у тым ліку кандыдат у прэзідэнты на выбарах 2010 года Мікалай Статкевіч, які знаходзіцца ў турме. Аднак усе ўжо забыліся пра Статкевіча, усе фармуюць нейкія ініцыятыўныя групы, усе хочуць атрымаць пэўныя рэсурсы пад выбары: Някляеў – забыўся, Мілінкевіч – забыўся. Сваімі дзеяннямі апазіцыя робіць рэжым легітымным.
Як на гэта ўсё глядзіць Еўропа? Па-рознаму. Марцін Шульц адназначна мяркуе, што выбараў няма і незразумела, чым займаецца апазіцыя. Ён, напрыклад, асабіста знаёмы з Мікалаем Статкевічам, таму тэму палітвязняў у Беларусі ўважае за галоўную.
У Майры Моры (кіраўніца прадстаўніцтва Еўразвязу ў Беларусі) іншая пазіцыя. На мой погляд, яна проста не разбіраецца ў пытанні і, фактычна, не ведае, што ёй рабіць.
Палітык распавёў пра тое, як на сітуацыю ў Беларусі паўплываюць вынікі выбараў у Польшчы. Станіслаў Шушкевіч параіў браць прыклад з дзеянняў прафзвязу «Салідарнасць» падчас ваеннага становішча 80-х гадоў.
– Можна адзначыць апошнюю падзею ў ЕЗ – перамогу на выбарах прэзідэнта Польшчы Анджэя Дуды, – сказаў ён. – З ім палякі будуць нас падтрымліваць. Ён больш антыпуцінскі, чым <>bБраніслаў Камароўскі. Калі браць прыклад з Польшчы, то трэба ўспомніць гісторыю. Калі моладзь адсунула старых у бок, не стала іх слухаць – адбыліся змены. Для нас павінна паслужыць прыкладам паспяховая барацьба «Салідарнасці» з савецкай акупацыяй.
Удзел у выбарчай кампаніі 2015 многія партыі апраўдваюць «партыйнай дзейнасцю». Я шчыра кажу – ніякай «партыйнай дзейнасцю» ў адпаведнасці з беларускім заканадаўствам займацца немагчыма. Таму я прапаную – давайце змагацца не за абстрактныя «выбары», а за рэальных палітвязняў.
Яшчэ я хачу сказаць пра ўдзел у выбарах. Адкажыце мне на пытанне: як можна ўдзельнічаць у выбарах, калі пасля кампаніі 2010 апазіцыю пазапаўнялі відавочныя здраднікі? Я маю на ўвазе Раманчука і Рымашэўскага, якія давалі паказанні супраць Андрэя Саннікава.
У палітыка спыталі, ці патрэбен «тэхнічны» кандыдат ад апазіцыі на выпадак нейкіх форс-мажорных абставінаў, у выніку якіх Лукашэнка не зможа ўдзельнічаць у выбарах.
– Тэхнічны кандыдат ад апазіцыі можа быць не лепшым прэзідэнтам, чым, напрыклад, Гайдукевіч. У Беларускай сацыял-дэмакратычнай грамады ёсць кандыдатура годнага чалавека, але толькі для ўдзелу ў сумленных выбарах – без Лукашэнкі і Ярмошынай.