Анатоль Лябедзька: ЕЗ павінен узмацніць санкцыі супраць памагатых Лукашэнкі
Наяўныя візавыя і эканамічныя абмежаванні ў дачыненні да беларускіх чыноўнікаў не дастаткова эфектыўныя.
Пра гэта заявіў старшыня Аб\’яднанай грамадзянскай партыі (АГП) Анатоль Лябедзька, каментуючы charter97.org вынікі ўчорашняй канферэнцыі ў Брусэлі «Дыялог аб мадэрнізацыі з беларускім грамадствам».
«На ўчорашняй дыскусіі не было прынята ніякіх рашэнняў і выніковых дакументаў. Але разам з тым я думаю, што яна сведчыць як мінімум пра тое, што мы перажываем час паміж ледніковым перыядам і пацяпленнем. Гэта своеасаблівы трэнд, які цяпер абазначыўся. У многіх структур і арганізацый ёсць спакуса ўвайсці ў яго па рыторыцы і па дзеяннях. Па-другое, я лічу памылкай, што палітычныя структуры, да якіх адносіцца і АГП, дыстанцыяваліся ад дыялогу мадэрнізацыі, які вельмі млява праходзіў у Менску. Але ўчора былі зробленыя заявы, што эксперты-ўдзельнікі гэтай гутаркі падрыхтавалі прапановы па пачатку паралельнага дыялогу паміж прадстаўнікамі ўлады і еўрапейскай супольнасцю. Гэта пэўная рызыка і пагроза, што грамадзянская супольнасць застанецца на пероне, а сам цягнік паедзе па шляху аўтарытарнай мадэрнізацыі», – адзначыў палітык.
Ён дадаў, што адбылася таксама дыскусія па санкцыях.
«У мяне свой пункт гледжання на гэты конт. Я лічу, што ніякіх санкцый у дачыненні да беларускага рэжыму з боку ЕЗ не існуе, гэта гульня слоў. Ёсць толькі кропкавыя абмежаванні для шэрагу чыноўнікаў, якія парушаюць як унутранае беларускае заканадаўства, так і міжнародныя абавязацельствы Рэспублікі Беларусь. Не больш за тое. Называць гэта санкцыямі – скажаць рэчаіснасць. Заява аб тым, што прыезд чыноўнікаў з Еўропы і перамовы з прадстаўнікамі ўлады садзейнічалі вызваленню палітычных зняволеных, з\’яўляецца як мінімум дыскусійнай. Таму што найбольш брутальныя рэпрэсіі былі пачатыя ў 2010 годзе пасля таго, як у прыёмнай Лукашэнкі адзначыліся вельмі многія еўрапейскія палітыкі Вестэрвеле, Салана, Сікорскі іБерлусконі. Хоць яны ўсе прыязджалі з пасланнем аб тым, каб «выбары» прайшлі мірна, тым не менш, усё скончылася тым, што больш за тысячу людзей апынуліся ў турмах», – упэўнены старшыня АГП.
Палітык упэўнены, што кропкавыя абмежаванні для вызвалення палітычных вязняў з\’яўляюцца неразумным крокам.
«Калі беларускія чыноўнікі плююць на Канстытуцыю і глядзяць на яе, як на туалетную паперу ў сваім асабістым клазеце, то на іх павінны быць аказаныя адпаведныя меры ўздзеяння. АГП на дадзеным этапе не лічыць неабходным увядзенне санкцый, якія будуць закранаць інтарэсы радавога сярэднестатыстычнага грамадзяніна Рэспублікі Беларусь. Калі гэта закранае інтарэсы бізнес-колаў, якія абслугоўваюць тых, хто трымае ўладу ў сваіх руках, гэта асобны пункт.
Што тычыцца прызыву Аляксандра Мілінкевіча аб адмене санкцый, то скажу, што нельга адмовіцца ад таго, чаго няма. Мы зыходзім з таго, што павінна быць рэалізаваная стратэгія трох крокаў. Першае, вызваленне і рэабілітацыя палітвязняў, і гэта тычыцца не толькі тых, хто ў турме, але і тых, хто прайшоў праз палітычныя рэпрэсіі. Другое, правядзенне свабодных і сумленных выбараў, гэта самы важны момант, і толькі гэта прывядзе да таго, што ў краіну прыйдуць перамены. Трэцяе, гэта план мадэрнізацыі для Беларусі. Але паслядоўнасць рэалізацыі менавіта такая», – падсумаваў палітык.
Нагадаем, учора ў Брусэлі адбылася канферэнцыя пад назвай «Дыялог аб мадэрнізацыі з беларускім грамадствам». Нягледзячы на гэта, выступленні еўрадэпутатаў і прадстаўнікоў беларускай грамадзянскай супольнасці ахоплівалі значна больш шырокія тэмы.