А мо так і трэба? У цэнтры Мінска прайшла акцыя «Краіна крывых люстэркаў»
Позна ўвечары ў нядзелю актывістамі РНС была праведзеная акцыя «Краіна крывых люстэркаў».
У раёне Парка Чалюскінцаў і Акадэміі Навук былі ўсталяваныя люстэркі з кратамі і лозунгамі ў цэнтры: «Пасуе?», «А можа, так і трэба?..», «Шмат думаеш? Ты наступны!», якія прымушаюць чалавека задумацца пра беларускія рэаліі.
Мэта акцыі – прапанаваць простым мінакам паглядзець на сябе з боку і шукаць прычыны татальнай апатыі і абыякавасці, у якіх знаходзіцца ўся краіна, перш за ўсё ў сабе, — паведамілі арганізатары акцыі «Нашай Ніве».
«Мы проста пакінулі гэтыя люстэркі ў тваім горадзе, бо раптам ты забыўся паглядзецца сёння, чалавеча.
А ці не забыліся паглядзецца твае родныя і сябры? Славутая беларуская памяркоўнасць: наколькі ўтульна табе жыць з ёй? Ці не адчуваеш ты, што тут нейкі фальш? А думкі? Ты можаш дазволіць сабе выказваць іх у любы час і ў любым месцы? Твой бацька кажа табе, што так, але адкуль тады ў табе гэты страх?»
Нагадаем, што два тыдні таму ў Мінску прайшла першая аналагічная акцыя.
Актывісты размясцілі ў нішы фасада дома №39 па праспекце Незалежнасці люстэрка з намалёванымі на ім маркерам турэмнымі кратамі і надпісам «Апынуцца можа кожны». Люстэрка прастаяла ў нішы два дні, пакуль не было «арыштавана» міліцыяй.