Абаронца Няронскага: Амаль за восем месяцаў следства так і не здабыла доказаў яго віны па артыкуле 342 Крымінальнага кодэкса
У аўторак, 2 лютага, у судзе Лагойскага раёна будзе абвешчаны прысуд палітвязню Уладзіміру Няронскаму, якога абвінавачваюць па двух артыкулах Крымінальнага кодэкса: арт. 369 і ч. 1 арт. 342. Дзяржаўны абвінаваўца Аляксандр Ляўковіч запрасіў у суда для яго тры гады пазбаўлення волі ва ўмовах агульнага рэжыму. Гэта самае строгае пакаранне з усіх магчымых. Палітвязень цалкам прызнаў віну па арт. 369 Крымінальнага кодэкса (абраза прадстаўніка ўлады), а па арт. 342 КК — не. Яго абаронца Сяргей Лепеш заявіў у спрэчцы, што ў судовым пасяджэнні не было ўстаноўлена ніводнага факту здзяйснення Няронскім злачынства, прадугледжанага ч. 1 арт. 342 Крымінальнага кодэкса, у сувязі з чым просіць апраўдаць яго па гэтым артыкуле. “Вясна” публікуе аргументы абаронцы Уладзіміра Няронскага, згодна з якімі віна палітвязня па артыкуле 342 Крымінальнага кодэкса не даказаная.
Следства больш за 7 месяцаў
У першую чаргу адаўкат Сяргей Лепеш звяртае ўвагу, што Уладзімір Няронскі, які абвінавачваецца ў здзяйсненні менш цяжкага злачынства і злачынства, якое не ўяўляе вялікай грамадскай небяспекі, утрымліваецца пад вартай ужо больш за 7 месяцаў знаходзіцца пад вартай, а з улікам адміністрацыйнага затрымання – больш за 8 месяцаў. Пры гэтым, за гэты час падчас папярэдняга расследавання так і не былі здабытыя доказы, якія абгрунтоўваюць здзяйсненне Няронскім злачынства, прадугледжанага па артыкуле 342 Крымінальнага кодэкса.
Дзе ў абвінавачванні палітвязня прозвішча Няронскі?
Абаронца Няронскага адзначае, што ў пастанове аб прыцягненні ў якасці абвінавачанага, вынесенае ў дачыненні да Няронскага 7 снежня 2020 года, адсутнічае ўказанне на тое, якімі менавіта канкрэтнымі дзеяннямі было ўчыненае злачынства, прадугледжанае арт. 342 Крымінальнага кодэкса:
“Аўтар абвінавачвання абмежаваўся толькі агульнымі фразамі, якія носяць выключна ацэначны характар, якія сведчаць хутчэй пра яго стаўленне да Няронскага, а таксама Статкевіча, Севярынца і Ціханоўскага”.
У пастанове аб прыцягненні ў якасці абвінавачанага пазначана, што Севярынец, Ціханоўскі і Статкевіч, «пачынаючы з 2019 года ў глабальнай кампутарнай сетцы стварылі і распаўсюджвалі заклікі да падрыхтоўкі, арганізацыі і актыўнага ўдзелу пры правядзенні выбараў Прэзідэнта Рэспублікі Беларусь у 2020 годзе ў групавых дзеянняў, якія груба парушаюць грамадскі парадак, і спалучаных з відавочным непадпарадкаваннем законным патрабаванням прадстаўнікоў улады, якія прывялі да парушэння працы транспарту, прадпрыемстваў, устаноў або арганізацый у Рэспубліцы Беларусь».
Адвакат Сяргей Лепеш звяртае ўвагу, што прозвішча Няронскага тут наогул не згадваецца.
Дзе заклікі Севярынца, Ціханоўскага і Статкевіча?
“У матэрыялах крымінальнай справы ў прынцыпе адсутнічаюць доказы, якія пацвярджаюць названыя абставіны, няма ніводнага “заклікі..”, распаўсюджанага Севярынцам, Ціханоўскім альбо Статкевічам. Ніхто з іх у судовым пасяджэнні не быў дапытаны. Крымінальныя справы ў адносінах да гэтых асобаў да цяперашняга часу не перададзеныя ў суд”, — звяртае ўвагу адвакат.
Згодна з артыкулам 106 КПК прысуд, які ўступіў у законную сілу па іншай крымінальнай справе, абавязковы для органа, вядучага крымінальны працэс, пры вытворчасці па крымінальнай справе ў дачыненні да як устаноўленых абставінаў, так і іх юрыдычнай ацэнкі.
Адвакат таксама звяртае ўвагу, што калі ў прысудзе суда па гэтай справе будзе пазначана, што Статкевіч і іншыя здзейснілі вышэйапісаныя дзеянні, то органы папярэдняга расследавання будуць вызваленыя ад абавязку даказваць гэтыя акалічнасці.
У пастанове таксама пазначана, што Уладзімір Няронскі «прыняў рашэнне далучыцца да Ціханоўскага і іншых з мэтай здзяйснення злачынства».
Аднак Няронскі паслядоўна адмаўляў сам факт наяўнасці ў яго намеру на здзяйсненне якога-небудзь злачынства. Ён тлумачыў, што сапраўды не без дапамогі Сяргея Ціханоўскага стварыў ютуб-канал “Слуцк для жизни”. Але мэта яго стварэння — асвятленне жыцця, у тым ліку і праблемных пытанняў, Слуцкага рэгіёна.
Як ацэньваць выказванні Няронскага ў відэароліках “Слуцк для жизни”?
У пастанове аб прыцягненні ў якасці абвінавачанага пазначана, што Няронскі на канале “Слуцк для жизни” стварыў і размясціў відэафайлы, якія змяшчаюць заклікі прыняць удзел у групавых дзеянняў, якія груба парушаюць грамадскі парадак, і спалучаных з відавочным непадпарадкаваннем законным патрабаванням прадстаўнікоў улады, якія прывялі да парушэння працы транспарту, прадпрыемстваў, устаноў або арганізацый у Рэспубліцы Беларусь. Аўтар пастановы аб прыцягненні ў якасці абвінавачанага ў дадзенай частцы пазначае тры відэафайлы: «Дорога на Минск», «Все приезжайте в поселок Дружный Евроопт», «Задержание. Дружный ТЭЦ-5».
“Якія менавіта выказванні Няронскага заклікалі асоб прымаць удзел у групавых названых вышэй дзеяннях у пастанове ад 7 снежня 2020 года не пазначана. Затое вельмі падрабязна пераказаны Закон Рэспублікі Беларусь “Аб масавых мерапрыемствах у Рэспубліцы Беларусь”.
У абвінавачванні пазначаныя 15 відэаролікаў, у якіх нібыта размясціў загадзя ілжывую інфармацыю, ацэнку нелегітымнасці выканання службовых і грамадскіх абавязкаў прадстаўнікамі і законнасці прад’яўляных імі патрабаванняў, заклікі ім непадпарадкавацца, здзяйсняць іншыя мерапрыемствы, звязаныя з актыўным удзелам у групавых дзеяннях, якія груба парушаюць грамадскі парадак.
Як адзначае адвакат, калі прааналізаваць відэазапісы, то ніякіх заклікаў да здзяйснення групавых дзеянняў, якія груба парушаюць грамадскі парадак, няма:
- «…Могилев умеет защищать своих…» — не з’яўляецца ніякім заклікам, проста канстатацыя факту.
- «Нас не надо задерживать, думая, что мы – враги» — не толькі не заклік да здзяйснення супрацьпраўных дзеянняў, а, наадварот, просьба аб яднанні.
- «Площади быть» — менавіта гэтаму выказванню Няронскага прысвечана больш за ўсё матэрыялаў крымінальнай справы, нават раздрукоўкі з гугла.
«Але судзіць за такое выказванне Няронскага, усё роўна, што асуджаць Касандру за падзенне Троі», — адзначае адвакат.
- «А что будет в Бобруйске 9 мая. Тысячи машин. Если они попробуют перекрыть проспект – все улицы заблокируют на 10 минут, 15 минут» — Няронскі проста кажа пра тое, што калі перакрыць праспект у Бабруйску 9 траўня, то астатнія вуліцы будуць заблакаваныя.
- На думку адваката, у гэтым роліку таксама няма ні аднаго згадкі аб групавых дзеяннях.
“Няронскі толькі кажа аб тым, што ў 2020 годзе народ «выйдзе». Пры гэтым ён заклікае ўсіх не чапаць міліцыянтаў, абураючыся, што тыя ездзяць на новых дарагіх машынах, а грошы, выдаткаваныя на іх набыццё, маглі быць выкарыстаныя на школы і садкі”, — адзначае абаронца Няронскага.
Таксама Няронскі кажа аб тым, што міліцыянтаў не варта баяцца, так як для гэтага няма падставаў.
- «И 9 мая не забывайте автобпробег, посвященный Дню Победы…» — ніякіх дзеянняў, якія груба парушаюць грамадскі парадак, і спалучаных з відавочным непадпарадкаваннем законным патрабаванням прадстаўнікоў улады або якія прывялі да парушэння працы транспарту, прадпрыемстваў, устаноў або арганізацый у Бабруйску 9 траўня не было.
“Адносна ілжывасці інфармацыі, то па роліках якія адзнятыя ў Слуцку, то ніхто не абверг звесткі, у іх выкладзеныя, не звярнуўся ў суд за абаронай гонару і годнасці. Ды і ніякіх дзеянняў груба парушаюць грамадскі парадак у Слуцку і здзейснена не было.
Неабходна адзначыць, што і ў гэтай частцы абвінавачванне не паказвае ў чым канкрэтна выказаліся супрацьпраўныя дзеянні Няронского, г.зн. дзе менавіта і якім дакладна спосабам (якімі словамі і выразамі) ён падаў ілжывую інфармацыю, даў ацэнку нелегітымнасці выканання службовых і грамадскіх абавязкаў прадстаўнікамі і законнасці прад’яўляюцца імі патрабаванняў, заклікаў ім непадпарадкавацца і здзяйсняць іншыя мерапрыемствы, звязаныя з актыўным удзелам у групавых дзеяннях, якія груба парушаюць грамадскі парадак.
Адносна памылковасці інфармацыі – мне б вельмі хацелася, каб звесткі аб тым, што заработная плата работнікаў на сяле часта складае 350 рублёў у месяц, а ўлада на месцах дапускае выпадкі безгаспадарчасці былі непраўдзівыя. Але ж усім вядома, што гэта не так”, — кажа адвакат Сяргей Лепеш.
Якое дачыненне здзяйсненне адміністрацыйнага правапарушэння мае да артыкула 342 КК?
У пастанове аб прыцягненні ў якасці абвінавачанага пазначана аб тым, што Няронскі у парушэнне Закона Рэспублікі Беларусь «Аб масавых мерапрыемствах» прыняў удзел у шэрагу несанкцыянаваных акцыяў, за што быў прыцягнуты да адміністрацыйнай адказнасці.
“Якое дачыненне здзяйсненне адміністрацыйнага правапарушэння мае да арт. 342 КК Рэспублікі Беларусь? Бо ў гэтай частцы ацэнка проціпраўнасці дзеянняў Няронскага, ступені іх грамадскай небяспекі ўжо дадзена судамі Беларусі і не можа быць пераацанена нават супрацоўнікамі Следчага камітэта”.
У кожнай пастанове аб прыцягненні Уладзіміра Няронскага да адміністрацыйнай адказнасці па арт. 23. 34 КаАП судом прама ўказана, што ў яго дзеяннях адсутнічае склад злачынства. Такая дыспазіцыя названага артыкула.
Прадстаўленыя пракурорам скрыншоты матэрыялаў СМІ даказваюць толькі тое, што ў Беларусі не было дзеянняў, якія груба парушаюць грамадскі парадак
Таксама на думку абаронцы Уладзіміра Няронскага, прадстаўленыя на мінулым судовым пасяджэнні пракурорам раздрукоўкі з інтэрнэт-рэсурсаў, якія нібыта даказваюць, што ў Беларусі мелі месца дзеяння, якія груба парушаюць грамадскі парадак, не сведчаць пра віну Няронскага. Так у іх ні разу не згадваецца яго прозвішча. З іх вынікае толькі тое, што 9 траўня 2020 года ў Бабруйску ніякіх дзеянняў, якія груба парушаюць грамадскі парадак і спалучаных з відавочным непадпарадкаваннем законным патрабаванням прадстаўнікоў улады або пацягнулі парушэнне працы транспарту, прадпрыемстваў, устаноў або арганізацый не было.
2 лютага ў 10:00 суддзя Аляксандр Рыбакоў агучыць прысуд.