Актывіста «Еўрапейскай Беларусі» Леаніда Кулакова затрымалі праз цішотку са сцягам
Леанід Кулакоў правёў у аддзяленне міліцыі тры гадзіны і пасля гэтага вызвалены.
Актывіст грамадзянскай кампаніі «Еўрапейская Беларусь» прыйшоў у суд Менскага раёна для таго, каб забраць фотаапарат, сканфіскаваны ў яго падчас папярэдняга арышту. Ля ўваходу да ягонай машыны падышлі супрацоўнікі міліцыі і затрымалі. Пра гэта сайту charter97.org паведаміў каардынатар грамадзянскай кампаніі «Еўрапейская Беларусь» Максім Вінярскі, які размаўляў з актывістам праз тэлефон. З ягоных слоў, Леаніда Кулакова адвезлі ў РУУС Ленінскага раёна. Пасля гэтага сувязь з актывістам знікла.
Праз тры гадзіны пасля затрымання Леанід Кулакоў звязаўся з charter97.org і паведаміў, што знаходзіцца на свабодзе. З ягоных слоў, супрацоўніца суда Менскага раёна выклікала міліцыю праз цішотку з выявай бел-чырвона-белага сцяга і герба «Пагоня», якая была надзетая на яго. «Яна заявіла супрацоўнікам, што я выкарыстоўваю такім чынам незарэгістраваную сімволіку. Аднак, калі мяне даставілі ў РУУС Ленінскага раёна, міліцыянты не знайшлі ў гэтым складу правапарушэння і праз прыкладна тры гадзіны мяне вызвалілі», – распавёў актывіст.
Нагадаем, 23 чэрвеня суд Менскага раёна прысудзіў Леаніда Кулакова да 10 дзён арышту за фатаграфаванне плаката ў падтрымку палітвязня Юрыя Рубцова.