Дзень нараджэння Эдуарда Лобава

ПЕРШАГА СНЕЖНЯ 2014 года свой чацвёрты Дзень народзінаў за кратамі адзначыў сустаршыня “Маладога Фронту”, палітвязень Эдуард Лобаў.

Яму споўнілася 26 год.

Лістваць сюды: 225295, Берасцейская вобл., г. Івацэвічы, “Воўчыя норы”, а/с 20, папраўчая калёнія № 22.

А неўзабаве, 18 снежня. чакаем Эдуарда на волі.

Эдуард Лобаў нарадзіўся ў Вільні 1 снежня 1988 года.

Палітвязень быў прыгавораны да чатырох гадоў зняволення ў калоніі ўзмоцненага рэжыму. Такая пастанова была вынесеная 24 сакавіка 2011 года ў судзе Маскоўскага раёна Менска суддзёй Аленай Шылько. 22-гадовы актывіст «Маладога фронту» быў прызнаны вінаватым паводле часткі 3 артыкула 339 Крымінальнага кодэкса – «асабліва злоснае хуліганства».

Эдуард Лобаў разам са старшынёй «Маладога фронту» Дзмітрыем Дашкевічам быў затрыманы ў Менску 18 снежня 2010 года.

Затрыманне Лобава і Дашкевіча было прэвентыўнай мерай спецслужбаў і міліцыі напярэдадні выбараў прэзідэнта, якія праходзілі на наступны дзень.

Да суда Эдуард утрымліваўся ў жодзінскім СІЗА, з пачатку сакавіка 2011 года – у Менскім СІЗА па вуліцы Валадарскага.

З 7 красавіка 2011 ён адбывае пакаранне ў івацэвіцкай калоніі № 22 (так званых «Ваўчыных норах»). Эдуард Лобаў павінен выйсці на волю 18 снежня, над ім ужо усталявалі прэвентыўны нагляд.