Міліцыянты прыехалі да Мікалая Статкевіча дахаты – каб уручыць павестку ў суд
1 кастрычніка міліцыянты Цэнтральнага РУУС Мінска прыехалі дахаты да Мікалая Статкевіча, каб уручыць павестку ў суд.
“Сэрвіс – супрацоўнікі Цэнтральнага РУУСа прыехалі да мяне дахаты, каб асабіста ўручыць павестку ў Цэнтральны суд на 7 кастрычніка. За нейкую з акцыяў, як я разумею, – паведаміў Мікалай Статкевіч. – Я зацаніў іх намаганні – праз увесь горад жа ехалі. І таму нават распісаўся за тую павестку, дадаўшы, што ў патрэбны ім дзень я павінен быць у Празе. Бо маю запрашэнне прачытаць лекцыі ў Дні Гавела.
Тыя прапанавалі тут жа дату суда на павестцы на 17-е памяняць, падставіўшы “1” перад ранейшай датай. Безумоўна, я абурыўся спробай фальсіфікацыі афіцыйнага дакумента на маіх вачах.
З’ехалі. Казалі, што яшчэ прыедуць. Нумар мабільнага самі ж арыштавалі, СМСкі слаць нельга. Цяпер поштай працуюць. Няўжо іншых заняткаў у іх няма? Мо тады варта іх скараціць?”