Нікалайчык – 13 сутак арышту, Садоўскай – штраф 60 базавых (+ відэа)
У судзе Цэнтральнага раёна Мінска 26 мая разглядаліся адміністратыўныя справы актывістак Вольгі Нікалайчык і Кацярыны Садоўскай. 29 красавіка да расійскай амбасады ў Менску Вольга Нікалайчык аднесла пакунак з жаночымі рэчамі, які назвала «касмэтычкай начных ваўкоў», а Кацярына Садоўская назірала за падзеяй як праваабаронца. Актывісткі пакінулі пакунак каля ўваходу і сышлі. Але пазней іх дагнаў міліцыянт, які ахоўваў амбасаду і забраў іхнія дакументы.
Вольга Нікалайчык паведаміла журналістам, што яе асабіста абвінавачваюць у аказанні супраціўлення супрацоўніку міліцыі і брыдкаслоўі.
Па двух пратаколах (арт. 23.4 КаАП і 17.1 КаАП) суддзя Міхаіл Хома пакараў актывістку Нікалайчык адміністратыўным арыштам на 13 сутак.
У дачыненні да Кацярыны Садоўскай, якую таксама абвінавацілі ў брыдкаслоўі і аказанні супраціву, суд вынес пастанову аб накладанні штрафу ў памеры 60 базавых велічынь. Гэта 10 мільёнаў 800 тысяч рублёў. Справу разглядаў суддзя Аляксандр Якунчыхін.