СК пакрывае КДБ у справе Мікалая Статкевіча
Сьледчы камітэт адмовіўся праводзіць праверку па факце затрыманьня Мікалая Статкевіча напярэдадні Дня Волі і зьмяшчэньня яго ў СІЗА КДБ.
Сьледчы камітэт лічыць, што зварот Статкевіча «не зьяўляецца заявай аб злачынстве».
«Таму законных падстаў для правядзеньня праверкі ў адпаведнасьці з артыкуламі 173-174 Крымінальна-працэсуальнага кодэксу Рэспублікі Беларусь няма», — гаворыцца ў лісьце.
Сьледчы камітэт матывуе гэта тым, што Статкевіч не апісаў канкрэтных прыкметаў якіх-небудзь супрацьпраўных дзеяньняў, якія падлягаюць крымінальнай кары, з боку супрацоўнікаў КДБ.
«З тэксту звароту ня ўгледжваецца, што супрацоўнікі КДБ злачынна, супрацьпраўна завалодалі Вамі, ужывалі ў дачыненьні да Вас гвалт або пагрозу яго ўжываньня, інакш кажучы, зьдзейсьнілі ў дачыненьні да Вас дзеяньні, якія відавочна выходзяць за межы іхніх правоў і паўнамоцтваў. Якая-небудзь рэальная пагроза Вашай бясьпецы таксама Вамі не апісаная», — гаворыцца ў лісьце Сьледчага камітэту.
Таксама адзначаецца, што па пытаньнях магчымых працэсуальных парушэньняў правоў падчас знаходжаньня ў СІЗА, а таксама пры затрыманьні і вызваленьні, Статкевіч можа зьвярнуцца ў Генпракуратуру.
Паводле Статкевіча, 24 сакавіка яго захапіла група зь сямі чалавек «сілавікоў» у масках і да 27 сакавіка ўтрымлівала ў СІЗА КДБ. Пасьля без тлумачэньняў палітыка вывезьлі за межы гораду і адпусьцілі.
«Падчас майго знаходжаньня ў турме і пасьля вызваленьня КДБ публічна адмаўляў факт майго захопу, а БТ нават заявіла, што я „недзе хаваўся“.
Пасьля вызваленьня я зрабіў запіс пра абставіны захопу і ўтрыманьня ў СІЗА ў кнізе заўваг і прапаноў прыёмнай КДБ. Проста, каб зафіксаваць факт злачынства, бо ілюзій наконт сёньняшняга стану законнасьці ў краіне я ня маю. У запісе патрабаваў прадставіць пісьмовае юрыдычнае абгрунтаваньне майго захопу і вызваленьня. Альбо ўзбудзіць крымінальную справу па факце выкраданьня і незаконнага ўтрыманьня ў зьняволеньні. Але гэтыя „барацьбіты за законнасьць“ ня лічаць неабходным нават фармальна выконваць нормы сваіх уласных „законаў“. Адказу я не атрымаў. Таму мусіў зьвярнуцца ў Сьледчы камітэт», — напісаў Статкевіч у фэйсбуку.
Статкевіч адзначыў, што адказ са Сьледчага камітэту яго ўразіў:
«Зь яго вынікае, што цяпер любога чалавека ў нашай краіне можна нават без фармальных юрыдычных прычын таемна схапіць і таемна ўтрымліваць у зьняволеньні. Хлусячы родным, што пра яго месцазнаходжаньне „нічога не вядома“. І ня трое сутак, як мяне, а колькі заўгодна».