Статкевіч і 200 дэманстрантаў прайшлі па праспекце Незалежнасці «Маршам абураных беларусаў 2.0»
Наша анлайн-трансляцыя сканчваецца. Дзякуй за ўвагу!
Рада Беларускага нацыянальнага кангрэса мусіць вырашыць, ці варта праводзіць акцыі ў рэгіёнах. Канкрэтных дат у Статкевіча пакуль няма.
«Акцыя прайшла годна», — падсумоўвае Статкевіч вынікі мерапрыемства для журналістаў.
Мікола Статкевіч нагадвае, што налета чакаецца 100-годдзе абвяшчэння Беларускай народнай рэспублікі. Пад воклічы «Жыве Беларусь!» ён завяршыў акцыю.
Статкевіч вырашыў не весці людзей да Дома ўрада, спыніліся каля Чырвонага касцёла.
«Лукашэнка, сыходзь! Свабоду!» — крычаць дэманстранты.
Людзі дайшлі да плошчы Незалежнасці. Чакаем кароткага выступу Міколы Статкевіча.
Шэсце прайшло будынак КДБ. Дождж прымушае рухацца шпарчэй. Найхутчэй, агулам акцыя працягнецца не больш за 40-50 хвілін.
Шэсце пад парасонамі — так можна назваць сённяшнюю акцыю пратэсту.
Мікола Статкевіч расказвае, што 10 дзён не жыў дома, каб пазбегнуць арышту. Сёння цэлую ноч давялося ехаць за стырном, смяецца ён.
Як бачым, мітынг быў кароткім — выступілі толькі Мікола Статкевіч і Вячаслаў Сіўчык.
Цяпер актывісты рушаць па ходніках праспекта Незалежнасці.
Акцыя не самая шматлікая — каля 200 чалавек.
Статкевіч ладзіць шэсце ў бок да плошчы Незалежнасці. Разам з тым на будучыню ён заклікае перанесці пратэсты са сталіцу ў рэгіёны.
«Шура, не будзь Януковічам, не піліце залаты батон» — такі плакат трымае таксіст Леанід Кулакоў.
Карэспандэнты «НН» перадаюць, што на Кастрычніцкай плошчы каля 200 актывістаў.
Удзельнікі акцыі скандзіруюць «Жыве Беларусь!». Яны трымаюць расцяжку з заклікам да Лукашэнкі не рабаваць народ.
Кіраўніка краіны называюць «Лукашэску» з відавочнай асацыяцыяй з Румыніяй.
«Мы трымаем шлях змагання за новую Беларусь! Мы будзем шукаць новыя формы барацьбы. Мы будзем спрабаваць абараніць людзей у рэгіёнах. Сёння мы зноў пакажам беларусам, што нельга стаяць на каленях», — выступае Мікола Статкевіч.
«Калі пакрыўдзяць хоць яшчэ аднаго салдата, мы выведзем на вуліцы палову краіны», — абяцае ўдзельнік з Лунінца. «Гэта проста жах», — кажа ён пра трагедыю з Аляксандрам Коржычам.
Якая-ніякая гукаўзмацняльная тэхніка ва ўдзельнікаў акцыі ёсць. Яны ўключылі на плошчы песні Сяргея Міхалка.
Тым часам актывісты разгортваюць бел-чырвона-белыя сцягі.
Надвор\’е ў Мінску найнепрыемнае — каля 5-6 градусаў цяпла, але накропвае няспынны дождж.
Мікола Статкевіч запэўнівае, што разбіральніцтва вакол сітуацыі ў Печах чыноўнікі пачалі толькі тады, калі дзедаўшчына ў войску стала тэмай акцыі пратэсту.
На плошчы ўжо некалькі дзясяткаў чалавек. Шмат асобаў у цывільным, якія фільмуюць іх.
На плошчы з’явіўся Мікола Статкевіч. Палітык распавёў, што частка гукаўзмацняльнай апаратуры была канфіскаваная міліцыяй.
Пакуль жа варта праінфармаваць пра прэвентыўныя затрыманні ў рэгіёнах. У Маладзечне — кіраўнік абласной арганізацыі Беларускай сацыял-дэмакратычнай партыі Аляксандр Абрамовіч, а таксама сябра партыі АГП Генадзь Фарыно.
А ў Баранавічах затрымалі прафсаюзнага актывіста Рыгора Грыка.
Наша тэкставая трансляцыя з акцыі пачнецца ў 13:50.
Былы палітвязень і экс-кандыдат на пасаду прэзідэнта Мікалай Статкевіч 21 кастрычніка праводзіць вулічную акцыю пратэсту «Марш абураных беларусаў 2.0».
Палітык заклікае людзей прыйсці а 14:00 на Кастрычніцкую плошчу ў Мінску.
Сярод тых пытанняў, якія плануецца разгледзець на плошчы: дэкрэт аб «дармаедах», павышэнне заробкаў і пенсій, а таксама смерці навабранцаў у войску. Апошні пункт стаў актуальны пасля трагічнай гібелі ў вайсковай часці ў Печах прызыўніка Аляксандра Коржыча.
Напярэдадні акцыі многія лідары вулічных пратэстаў былі пакараныя адміністрацыйнымі арыштамі: Павел Севярынец, Яўген Афнагель, Максім Вінярскі, завочна асуджаны Вячаслаў Сіўчык.
Папярэднюю акцыю пратэсту Статкевіч праводзіў 8 верасня — у Дзень беларускай вайсковай славы, — тады на яе сабралася каля трохсот чалавек. Людзі прайшлі шэсцем ад Кастрычніцкай плошчы да плошчы Якуба Коласа. У той раз удзельнікі пратэставалі супраць вучэнняў «Захад-2017».