Яўген Васьковіч сустрэнецца з маці ў красавіку
Маці Яўгена Васьковіча расказала, што збіраецца 17 красавіка сустрэцца з сынам.
– Гэта будзе кароткатэрміновае спатканне, – паведаміла Рушанія Васьковіч. – Абавязкова перадам Яўгену ўсе прывітанні ад сяброў і знаёмых. Што тычыцца здароўя і самаадчування сына, ён не скардзіцца. Канешне, стамляецца на працы, бо не прывык да фізічнай нагрузкі, але моцна стараецца. З-за недахопу часу бывае не можа адказваць на лісты. Нават мне толькі адзін ліст за месяц дайшоў.
Нагадаем, што ў пачатку лютага Яўген ужо меў магчымасць сустрэцца з маці. Тады Рушанія Васьковіч атрымала суткавае спатканне з сынам.
Да лютаўскага спаткання маці і сын бачыліся толькі аднойчы за чатыры гады зняволення, напрыканцы мінулага года: яны размаўлялі праз шкло і ў прысутнасці наглядчыка.