Юры Рубцоў падаў у суд на суддзю
Палітвязень Юры Рубцоў, які адбывае тэрмін у вёсцы Купліна Пружанскага раёна, 6 лютага падаў іскавую заяву аб спагнанні маральнай шкоды з суддзі Кірыла Палулеха, за абразу якога ён быў асуджаны да «хіміі».
У пазове, пададзеным у суд Савецкага раёна г. Мінска, паказваецца, што 28 красавіка 2014 адказчык Кірыл Палулех, разглядаючы адміністрацыйную справу ў дачыненні да Юрыя Рубцова, які ўдзельнічаў у акцыі «Чарнобыльскі шлях», прычыніў яму «значную маральную шкоду».
У прыватнасці, адзначаецца, што суддзя пачаў працэс, нягледзячы на тое, што супрацоўнікі міліцыі, якія канваявалі актывіста, прадставілі яго перад суддзёй у адных штанах, г.зн. па пояс распранутым.
Юры Рубцоў указвае ў пазове, што яго гэта «прымусіла адчуць перад дзяржаўнымі сімваламі, а менавіта гербам і сцягам прыніжэнне і сорам, а таксама бездапаможнасць і безабароннасць перад свавольствам і ўсёдазволенасцю чыноўніка, адзетага ў судзейскую мантыю».
Акрамя таго, як піша палітвязень, суддзя Кірыл Палулех кінуў у яго бок рэпліку «чаго вы тут трасеце сваімі сіськамі!».
Па гэтых фактах Юры Рубцоў накіроўваў скаргу на імя старшыні Вышэйшай кваліфікацыйнай калегіі суддзяў Вярхоўнага Суда, аднак у адказе яму паведамілі аб заканчэнні тэрмінаў прыцягнення адказчыка да дысцыплінарнай адказнасці. Як лічыць палітвязень, такім чынам Вышэйшая кваліфікацыйная калегія суддзяў не аспрэчвае апісваных ім фактаў.
Памер маральнай шкоды Юры Рубцоў ацэньвае ў 18 сярэднямесячных заробкаў. На дзень прычынення яму маральнай шкоды заробак складаў 6.937.100 рублёў (у агульнай складанасці каля 125 млн). Палітвязень назваў лічбу ў 18 заробкаў, паколькі тэрмін яго зняволення складае паўтара года.
Юры Рубцоў абяцае, што калі выйграе суд, то адсуджаныя грошы накіруе на карысць выдавецтва «Логвінаў».
Нагадаем, 6 кастрычніка 2014 года Юрыя Рубцова асудзілі да «хіміі» на два з паловай гады (год адразу скарацілі па амністыі) за абразу суддзі Кірыла Палулеха. Праваабаронцы адзначалі, што судовы працэс праходзіў са шматлікімі парушэннямі, і сапраўднай прычынай прысуду стала палітычная актыўнасць Рубцова.