Жонка Каваленкі: «Адвакат сказаў, што ён памірае»
29 сакавіка з галадоўнікам Сяргеем Каваленкам сустрэўся адвакат. Пра вынікі сустрэчы распавяла жонка вязьня Алена Каваленка.
«Ён сказаў, што Сяргей памірае. Ён важыць ужо 45 кіляграмаў, незваротныя працэсы пачаліся зь пячонкай і страўнікам, але яму ніяк не дапамагаюць, чакаюць, відаць, пакуль ён памрэ. Пра тое, што ў калёніі нібыта чакаюць дазволу з суду на прымусовае кармленьне, адвакату нічога не вядома. Не выключаю, што гэта яны хлусяць. Зараз паімчуся ў калёнію, каб выклікаць Сяргею хуткую дапамогу», — паведаміла Алена Каваленка.
Сёньня ж жонка палітвязьня накіравала скаргу на імя пракурора Віцебскай вобласьці ды іншых службовых асобаў з заклікам тэрмінова аказаць Сяргею Каваленку неабходную мэдычную дапамогу і папярэджаньнем пра адказнасьць за неаказаньне дапамогі.