Алесь Марачкін: Без вызвалення палітвязняў – ніякіх выбараў
Ні пра якія «выбары» казаць нельга, калі перад гэтым не вызваленыя ўсе палітвязні, а перш за ўсё – Мікалай Статкевіч.
Кіраўнік творчага аб\’яднання «Пагоня», сябра аргкамітэта ў стварэнні партыі «Беларускi рух» Алесь Марачкін распавёў charter97.org, чаму на бліжэйшых «выбарах» у Беларусі варта прытрымлівацца тактыкі поўнага байкоту.
– Я мяркую, што ні пра якія «выбары» казаць нельга, калі перад гэтым не вызваленыя ўсе палітвязні, а перш за ўсё – Мікалай Статкевіч. І я падтрымліваю ідэю вылучэння Статкевіча адзіным кандыдатам ад дэмакратычных сілаў. Але я разумею, што ўлада не пойдзе на вызваленне палітвязняў, і таму гаворкі пра нейкія «выбары» не можа быць наогул. Я прытрымліваюся стратэгіі поўнага байкоту, – сказаў ён.
– А як вы ацэньваеце дзеянні палітычных сілаў, якія ўжо пачалі вылучаць сваіх кандыдатаў на «выбары»?
– На жаль, мы паўтараем памылкі усіх мінулых гадоў: у нас няма адзінства. Мы не вучымся на памылках. Мы павінны былі сфармуляваць нейкую агульную платформу – няхай гэта будзе адзіны кандыдат або поўны байкот. Я вельмі расчараваны паводзінамі гэтых партый і груповак, якія ўжо вылучаюць «кандыдатаў». Яны не могуць правесці нейкую адну агульную для ўсіх ідэю. І гэтым разам яны не жадаюць вучыцца на сваіх памылках. Не я адзін прытрымліваюся такога меркавання. Гэтае пытанне – аб\’яднацца вакол адной ідэі або аднаго кандыдата – уздымалася на Радзе інтэлігенцыі. Але тыя, хто наважыў пагуляць з рэжымам у «выбары» – яны да нас не прыслухаліся.