Арыштаваны Андрэй Пачобут (дадаецца)
Супраць журналіста завялі крымінальную справу. Яго вінавацяць паводле артыкулу «паклёп на прэзыдэнта».
Падставамі для абвінавачваньня сталі артыкулы на сайтах «Хартыя 97» і «Беларускі партызан».
ачобута арыштавалі ў ягонай хаце ў Горадні вечарам 21 чэрвеня. Жонка Андрэя Пачобута Аксана распавяла, што прыходзіў той самы сьледчы Гарадзенскай пракуратуры Арсені Нікольскі, які раней вёў справу Пачобута і міліцыянты. У хаце яны нічога не шукалі, сказалі адразу, што прыйшлі па Андрэя і кампутары.
У хаце зрабілі ператрус. Сканфіскавалі кампутары. Пачобута павезьлі на допыт. Ён адмовіўся адказваць на пытаньні. Яго завезьлі ў гарадзенскую турму.
Пачобута вінавацяць паводле крымінальнага артыкулу 367, частка 2 — «паклёп у адносінах прэзыдэнта, што ўтрымліваецца ў публічным выступе, альбо ў друкаваным ці публічна дэманструемым творы, альбо ў СМІ, зьдзейснены асобай, што раней была асуджана за паклёп альбо зьнявагу».
Паводле Крымінальнага кодэксу, журналіста могуць пакараць абмежаваньнем волі на тэрмін да 5 гадоў альбо пазбаўленьне волі на такі ж тэрмін.
Польскі МЗС пра арышт Пачобута: «Чарговы доказ кепскай сытуацыі з правамі чалавека»
Жонка журналіста Аксана Пачобут паведаміла Радыё Свабода:
«Сёньня Андрэй працаваў у хаце, пісаў артыкул пра Алеся Бяляцкага. Прыйшла міліцыя да нас дадому, з абласной пракуратуры. Прыйшло шэсьць чалавек, гэта быў сьледчы, два чалавекі ў мундзірах, і яшчэ два мужчыны і адна жанчына ў цывільным. Сьледчы сказаў, што ў нас у хаце будзе вобшук, але што гэта ўсё адбудзецца хутка, бо яны прыйшлі за кампутарам і за Андрэем, каб звазіць яго на допыт. Усё трывала, як мне падалося, менш за гадзіну. Яны забралі кампутар і забралі Андрэя, які ўжо ведаў, што яго сёньня пасадзяць у турму. Ён сабраў у сумку рэчы, якія змог сабраць на хуткую руку. Яго адразу адвезьлі ў пракуратуру, там ён сустрэўся з адвакатам, адмовіўся даваць паказаньні, і яго адразу павезьлі ў турму.
Ён сказаў мне падчас вобшуку, што ў яго была такая інфармацыя, паводле якой ён мог рабіць высновы, што яго зноў пасадзяць у турму, што зноў будзе ўзбуджаная крымінальная справа супраць яго».
Праваабаронца Тацяна Равяка:
«Канечне, гэта вельмі кепскія тэндэнцыі — напярэдадні выбараў затыкаць рот журналістам. Гэты арышт — папярэджаньне ўсім журналістам, якія ў тым ліку зьбіраюцца аб’ектыўна асьвятляць выбары, у тым ліку паказваць нейкія недахопы, якія існуюць у краіне падчас выбарчай кампаніі і ня ў зьвязку з выбарчай кампаніяй, у сувязі з агульнай сытуацыяй у краіне. Гэта проста знак усім астатнім журналістам прыкрыць рот».
Намесьнік старшыні БАЖ Андрэй Бастунец:
«Ёсьць некалькі рэчаў, на якія я хацеў бы зьвярнуць увагу. Андрэй і зараз знаходзіцца, як кажуць, пад артыкулам, бо ён быў асуджаны год назад і атрымаў тэрмін з адтэрміноўкай. І тое, што зараз ідзе іншая справа, паказвае, што ягонае ўмоўнае пакараньне можа стаць рэальным, незалежна ад таго, як справа будзе разглядацца надалей».
Віктар ІвашкевічПакараньне, прадугледжанае за паклёп і абразу (паводле п. 2 артыкулаў 188, 189): штраф ці папраўчыя работы да двух гадоў, арышт (адпаведна да шасьці ці трох месяцаў), абмежаваньне волі да трох гадоў.
Андрэй Пачобут — карэспандэнт польскай «Газэты выборчай» у Беларусі. У аснове крымінальнай справы — публікацыі журналіста: восем з «Газэты выборчай» і дзьве з інтэрнэту — зь «Беларускага партызана» і «Жывога журналу». Андрэю Пачобуту прад’явілі абвінавачаньне па двух артыкулах Крымінальнага кодэксу РБ — 368 (частка 1) — «абраза» і 367 (частка 1) — «паклёп» у адносінах да прэзыдэнта.
Валянцін Стэфановіч: «Арышт Пачобута дэманстратыўны. Гэта сыгнал Захаду, што Менск ня будзе прыслухоўвацца да яго патрабаваньняў. Андрэй Пачобут ужо прыцягваўся да крымінальнай адказнасьці паводле артыкула 367 (паклёп у дачыненьні да прэзыдэнта). Ён быў асуджаны на пазбаўленьне волі з адтэрміноўкай да трох гадоў. І цяпер у дачыненьні да яго будзе прымяняцца кваліфікацыя па другой частцы артыкула — як да асобы, якая раней зьдзяйсьняла падобныя злачынствы. Усё ўскладняецца тым, што новая крымінальная справа ўзбуджаецца ў пэрыяд, калі ня скончылася адтэрміноўка па папярэдняй крымінальнай справе. Цяпер яму пагражае ад 3 да 5 гадоў пазбаўленьня волі. І варыянтаў выкарыстаньня абмежаваньня волі тут, напэўна, не атрымаецца».
Аляксей Кароль: «Тут трэба адзначыць два складнікі. Па-першае, Пачобут, які быў асуджаны па гэтым жа артыкуле, не скарыўся. Ён таленавіты аўтар, ягоныя артыкулы былі ўплывовымі. І ўлады вырашылі адпомсьціць.
Другі чыньнік: Пачобут — журналіст. Гэта сыгнал усім мэдыям, журналістам перад выбарамі. Улады ўспрымаюць незалежныя мэдыі як галоўнага праціўніка».
Польшча патрабуе тэрмінова вызваліць журналіста Андрэя Пачобута.
Амбасадару ўручана нота пратэсту. З Віктарам Гайсёнкам сустрэўся намесьнік міністра замежных спраў Польшчы Ежы Памяноўскі. Міністар заявіў, што такія дзеяньні з боку беларускіх уладаў толькі паглыбляюць самаізаляцыю краіны, ускладняюць стасункі з Эўразьвязам, выклікаюць чарговую хвалю крытыкі. Гэта можа стацца падставай для яшчэ большага ўзмацненьня санкцыяў у дачыненьні афіцыйнага Менску, — заявіў Ежы Памяноўскі.