Гэтыя 10 сутак здаюцца мне помстай за нейкі сарваны план

«…Гэтыя 10 сутак здаюцца мне помстай за нейкі сарваны план у дачыненні да мяне. Які, можна толькі здагадвацца. … Калі змаўчу, то будуць яшчэ больш «крутыя» планы».

Такія радкі напісаў Мікалай Статкевіч аб падзеях 20-21 чэрвеня, якія сталіся рэакцыяй на чарговую адмову напісаць прашэнне, у лісце да жонкі.

Ён распавёў таксама аб сваёй «схільнасці да суіцыду»… 27 чэрвеня палітык падаў заяву на імя начальніка турмы, Аляксандра Ламазы, у якой узгадаў, што яшчэ ў студзені падчас паседжання камісіі той зрабіў заяву, што Мікалай Статкевіч схільны да суіцыду. У сувязі з падзеямі 20-21 чэрвеня такія заявы ўспрымаюцца інакш. Таму палітвязень (далей цытуем) «папрасіў у начальніка турмы адказаць на два пытанні: 1) адкуль ён узяў інфармацыю аб маіх «суіцыідальных» схільнасцях; 2) ці не збіраецца ён прымусіць мяне да суіцыду і потым апраўдаць сябе гэтымі маімі нібыта «схільнасцямі» — «ведь я же предупреждал»».

Далей Мікалай Статкевіч піша, што 27-га чэрвеня пасля абеду адбылося паседжанне камісіі турмы, на якім начальнік, хаця і не адразу, падцвердзіў факт сваёй заявы, але не адказаў, чаму ён яе зрабіў. На той жа камісіі кандыдату ў прэзідэнты і яго суседу па камеры вынеслі спагнанне — па 10 сутак карцэра, нібыта, за выпадак 20-21-га чэрвеня.

«За што дакладна, я так і не зразумеў. Ніхто таго чалавека і пальцам не крануў, голас на яго не ўзвысіў. (…) Няўжо я такі страшны?» — задае пытанне Мікалай Статкевіч.

«Увогуле, гэтыя 10 сутак здаюцца мне помстай за нейкі сарваны план у дачыненні да мяне. Які, можна толькі здагадвацца. (…)  Калі змаўчу, то будуць яшчэ больш «крутыя» планы» — напісаў палітык.