Мікалай Статкевіч. Дэфініцыі апазіцыі

Дэградацыя апазіцыі вядзе да ператварэння грамадства ў какнфармісцкае балота, і можа прывесці да ператварэння аўтарытарнай дзяржавы ў таталітарную.

Апошнім часам у беларускай апазіцыйнай прэсе ўсё часцей можна сутыкнуцца з падзелам апазіцыі на памяркоўную і радыкальную. Але ва ўсім свеце радыкальнай называюць малую частку апазіцыі, якая дэкларуе крайнія палітычныя лозунгі ці дасягае сваіх мэтаў з дапамогай зброі.

Нічога падобнага да гэтага ў сённяшніх беларускіх рэаліях не назіраецца. Ніхто ж да палітычных, сацыяльных ці этнічных чыстак, як і да зброі, не заклікае.

Бачыцца, што падмена палітычных вызначэнняў патрэбная той частцы беларускай апазіцыі, якая спыніла рэальную палітычную барацьбу з уладай і за ўладу, абвясціўшы яе праявай радыкалізму. Хоць такая барацьба з\’яўляецца абавязкасм і прыкметай палітычнай апазіцыі ў любой краіне. Бо нельга ж лічыць палітычнай барацьбой толькі пасяджэнні ў закрытых памяшканнях ці напісанне скаргаў ды прапаноў для дзеючай улады.

Спыніўшы барацьбу, гэтак званая “памяркоўная” апазіцыя перастае быць палітычнай сілай і непазбежна пачынае ператварацца ў “канструктыўную” апазіцыю. На “наваязе” аўтарытарных рэжымаў гэта – інстытуцыя, прызначэнне якой толькі ў пакорлівым удзеле ў “выбарах” з загадзя вядомым вынікам і ў асцярожнай крытыцы “асобных часовых недахопаў” чыноўнікаў другога эшэлону ўлады.

Дэградацыя апазіцыі вядзе да ператварэння грамадства ў какнфармісцкае балота, і можа прывесці да ператварэння аўтарытарнай дзяржавы ў таталітарную.

Адсутнасць для новых пакаленняў прыкладаў рэальнай барацьбы за грамадскія ідэалы пагражае будучыні краіны.

М. Статкевіч                                                                                           кастрычнік 2014

турма №4