Мікалай Статкевіч: Для адміністрацый мы – як бомбы

Мікалай Статкевіч адгукнуўся на “ЛістЫ з пекла” Мікалая Аўтуховіча.

 Мікалай Аўтуховіч (2009)

Аб гэтым паведаміла жонка палітыка, Марына Адамовіч.

– Гэты ліст я ўжо і не спадзявалася атрымаць. Думала, што сканфіскавалі. Але ж не. Атрымалаа сёння разам з іншым – адразу два. Мабыць, доўга вырашалі – “падрыўны” ён ці “цынічны”, ды так ні да чаго і не давырашаліся, – кажа жонка.

Мікола піша: “Чытаў у НВ” вялікі артыкул Мікалая Аўтуховіча пра ўмовы ў Гродзенскай турме і ў калоніях, дзе ён быў. Тут большасць праблем, пра якія ён піша, ужо вырашаны. І бялізну з мінулагодняй восені пачалі ў банны дзень мяняць (без майго ўмяшальніцтва, дарэчы – апярэдзілі ), і з туалетнымі прыладамі ўсё па законе. (Раней, дзякуючы Мікалаю, у магілёўскай турме пачалі выдаваць зняволеным належныя гігіенічныя прылады. Рэд.) Праўда, ёсць свае “асаблівасці” і тут. Я маю на ўвазе сітуацыю з падпіскай і кніжнымі бандэролямі. Дык і ў Шклове такой дурасці не было, як тут”.

Палітык мяркуе, што ў адміністрацыі Гарадзенскай турмы павінны ўзнікнуць “вялікія праблемы” ў сувязі са з\’яўленнем ліста Аўтуховіча: “Не ведаю, як такі вялікі артыкул Мікалая выйшаў з турмы. Не думаю, што лістом. Калі гэта “калегі па няшчасцю” Мікалая арганізавалі яму “дарогу”, то ў кіраўніцтва Гарадзенскай турмы вялікія праблемы. Атрымоўваецца, што Мікалай разлічыўся з імі”.

Далей Мікалай Статкевіч звяртаецца да пытання аб выкананні незаконных загадаў і распаўсюджанай у турэмнай сістэме практыцы супрацьпраўнага  ціску на палітвязняў.
“Разумею, што для адміністрацый мы – як бомбы, размешчаныя ў іх установах. Дык ня трэба было па той бомбе лупіць нагамі. Нават, калі пра тое просяць розныя “суседзі”. Калі ўлада памяняецца, то тыя ж “суседзі”, каб выслужыцца перад новай, яшчэ і крымінальную справу завядуць на тых “ворагаў дэмакратыі”, каму раней самі ўказанні давалі на нас “ціснуць,” – напісаў Мікалай Статкевіч, па сутнасці, звяртаючыся да адміністрацый папраўчых устаноў, дзе ўтрымліваюцца палітвязні.