Мікалай Статкевіч і Марына Адамовіч пабраліся шлюбам у калоніі

Экс-кандыдат у прэзідэнты Мікалай Статкевіч у аўторак (21.12.2011) распісаўся з Марынай Адамовіч у шклоўскай калоніі.

Свадьба в колонии | Марына Адамовіч едзе на шлюб

Рэгістрацыі адносінаў пара дамагалася каля года.

– Гэты час цягнуўся так доўга, што, акрамя трывогі, чакання і страху, я нічога не адчуваю, – прызналася Марына Адамовіч у гутарцы з карэспандэнтам «Салідарнасці» . – За год мы з Мікалаем бачыліся толькі на судзе і 30 мая размаўлялі праз шкло. Я не магла да яго нават дакрануцца.

Па законе маладым належыць кароткатэрміновае спатканне да трох дзён. Аднак Марыне далі адны суткі на сустрэчу з мужам. Спатканне скончыцца ў 8.30 21 снежня. За начлег у пакоі шклоўскай калоніі жонцы прыйшлося заплаціць 25 000 рублёў.

Як распавёў блогер Андрэй Кабанаў, які суправаджаў Марыну Адамовіч у паездцы ў калонію, адміністрацыя турмы зрабіла вясельны падарунак маладым.

– Пасля спаткання Статкевічу дазволілі забраць з сабой 30 кілаграмаў прадуктаў. Хоць у адпаведнасці з заканадаўствам зняволенаму належыць 2-3 пасылкі на год, – удакладніў Кабанаў.

Марына Адамовіч была наслышаная аб тым, што беларуская пенітэнцыярная сістэма прадугледжвае роспіс на працягу дзесяці хвілін, таму пра святочную атмасферу не марыла. Вяселле ў турме прайшло без сведак.

Па словах Андрэя, нявеста ў ружовай сукенцы выглядала шыкоўна і хвалявалася.

– У Шклове нас сустрэла адміністрацыя калоніі поўным складам, – распавёў суразмоўца.

Напярэдадні вяселля Мікалай Статкевіч правёў пяць сутак у ШІЗА як «злосны парушальнік» рэжыму, а потым быў змешчаны ў памяшканне камернага тыпу. Блізкія палітвязня звязвалі гэта з публікацыямі ягоных лістоў, якія трапілі на волю ў абыход адміністрацыі.