Мікалай Статкевіч: Кандыдатаў на "вяртанне дамоў" двое – мы і паўночныя вобласці Казахстана.

Мікалай Статкевіч – кандыдат на мінулых прэзыдэнцкіх выбарах, палітвязень, які ўжо 3,5 гады знаходзіцца за кратамі, ацэньвае становішча на постсавецкай прасторы, якое складваецца пасьля гэтак званых «рэфэрэндумаў» ва украінскіх Данецку і Луганску.

Мікалай Статкевіч і раней пісаў пра магчымыя варыянты развіцця падзей ва Украіне.

Пра магчымае развіццё падзей пасля данбаскіх “рэферэндумаў” – працяг тэмы:

“Учора-сёння галоўная навіна па расійскаму TV – данбаскі “рэферэндум” і “ўнікальна вялікая яўка выбаршчыкаў”. І гэта – падчас баявых дзеянняў. Усё гэта нагадвае мне анекдот, што завяршаецца словамі ўрача-сэксапатолага: “І ты скажы”.

Гледзячы па ўсяму, Масква выбірае ў дачыненні да Украіны стратэгію падтрымання пастаяннага канфлікту ва ўсходніх украінскіх абласцях. Пра хібы гэтай стратэгіі я пісаў раней.

У выніку, з-за іх, у першую чаргу, з-за ўнутрырасійскіх праблемаў, праз 1-2 гады рэйтынг Пуціна ізноў апусціцца. Але ён ужо ведае, як яго падымаць. Думаю, што чарговую аперацыю па пад\’ёму прымяркуюць бліжэй да прэзідэнцкіх выбараў у Расіі ў сакавіку 2018 года.

Кандыдатаў на “вяртанне дамоў” двое – мы і паўночныя вобласці Казахстана. Але ў Казахстане “элегантнага” далучэння можа не атрымацца – казахі будуць ваяваць. А весці баявыя дзеянні на агромністых стэпавых прасторах доўга, цяжка, накладна і не вельмі “элегантна”. Так што, Казахстан могуць пакінуць у спакоі. Калі, безумоўна, там не адбудзецца дэстабілізацыі ў выніку канчыны іхняга правадыра. Аўтарытарныя рэжымы, пры іх знешняй, нібыта, стабільнасці, насамрэч, вельмі нестабільныя. І смерць аўтакрата (натуральная ці не) абрынае іх у хаас. Але, калі Казахстан захавае стабільнасць, то кандыдат на пашырэнне Расіі №1 – мы. Прычым, цалкам. І падрыхтоўка да гэтага, прынамсі, эканамічная, у поўным разгары.”

Мікалай Статкевіч 
12.05.2014
Магілёў, турма №4