Мікалай Статкевіч перадае прывітаньне «артылерыстам»
Паводле жонкі палітвязьня Мікалая Статкевіча, ён не скардзіцца на здароўе і перадае прывітаньне ўсім, хто яго падтрымлівае. Асаблівае прывітаньне Мікалай Статкевіч прасіў перадаць тым, хто зладзіў фаервэрк у сьцен магілёўскай турмы на Дзень Волі.
Марына Адамовіч:
«Ён здагадаўся, што фаервэрк, які быў 25-гасакавіка каля турмы, рабіўся для яго. Ён нават бачыў водблескі на сьцяне супрацьлеглага будынку. Наколькі дазвалялі жалезныя “расьнічкі” на вокнах. Прасіў перадаць прывітаньне артылерыстам — маецца на ўвазе тым, хто гэта зрабіў для яго».
Паводле ліста ад Мікалая Статкевіча, ў турме ён пачаў пісаць эсэ, прысьвечанае тэме беларускай нацыянальнай ідэі.
Былы кандыдат на прэзыдэнта Мікалай Статкевіч асуджаны на 6 гадоў зьняволеньня за падзеі 19 сьнежня 2010 году. Палітыка трымаюць у крытай магілёўскай турме як злоснага парушальніка рэжыму.