Мікалай Статкевіч: У Брусэлі пачулі наш заклік не скасоўваць санкцыі
Кіраўніца прадстаўніцтва Еўрапейскай камісіі ў Беларусі Андрэа Віктарын сустрэлася з лідарамі беларускай апазіцыі.
На сустрэчы з нямецкім дыпламатам былі запрошаныя былы палітвязень, кіраўнік Беларускай сацыял-дэмакратычнай партыі (Народная Грамада) Мікалай Статкевіч, старшыня Аб\’яднанай грамадзянскай партыіАнатоль Лябедзька, паэт, грамадскі дзеяч Уладзімір Някляеў і намеснік старшыні руху «За свабоду» Юрась Губарэвіч.
Пасля сустрэчы Мікалай Статкевіч паведаміў сайту charter97.org, што галоўнай тэмай размовы стала сітуацыя ў Беларусі напярэдадні так званых «прэзідэнцкіх выбараў», а таксама санкцыі Еўразвязу ў дачыненні да рэжыму Лукашэнкі.
– Кіраўніца прадстаўніцтва Еўракамісіі паведаміла, што ў Брусэлі атрымалі наш зварот аб неабходнасці захавання санкцый супраць беларускага рэжыму, які мы накіравалі лідарам Еўразвязу разам з Андрэем Саннікавым і Алесем Бяляцкім. Мяне запэўнілі, што дакумент быў успрыняты вельмі сур\’ёзна.
Не зусім добра было б расказваць увесь змест сустрэчы, але магу сказаць, што мы заявілі адназначна – выбараў у Беларусі няма, гэта фарс, і да іх трэба ставіцца адпаведным чынам. Таксама абмяркоўвалі будучую акцыю 10 кастрычніка, а таксама сітуацыю з размяшчэннем у Беларусі расейскай вайсковай базы, – сказаў Статкевіч.