Палітвязні не актуальныя? (Відэа)

“Перадумова дыялогу – гэта вызваленне і рэабілітацыя вязняў сумлення”.

Гэтак выказваўся пра дыялог з афіцыйным Менскам не толькі міністр замежных справаў Польшчы Радослаў Сікорскі, але і ўся Аб’яднаная Еўропа пасля брутальнага разгону выбарчых пратэстаў у 2010 годзе. Але ўчора ўвечары кіраўнік польскай дыпламатыі сустракаў у Варшаве свайго беларускага калегу. А за дзень да гэтага адбылася тэлефонная размова прэм’ера Дональда Туска і Аляксандра Лукашэнкі. Гутарылі пра двухбаковыя адносіны і вынікі менскага саміту. «Апошні дыктатар Еўропы» ўжо не такі страшны?

ВАДЗІМ МАЖЭЙКА, «ЛІБЕРАЛЬНЫ КЛУБ»:
«У нас у Еўропе ідзе натуральная вайна, то, канечне, на другі план адыходзяць усе іншыя, менш істотныя пытанні. Ну, і канечне, Лукашэнка, з усімі ягонымі дзеяннямі і палітвязнямі выглядае менш інфернальна, чымся Пуцін, з-за якога гінуць сотні і тысячы людзей».

Драму некалькіх чалавек, зняволеных за свае палітычныя перакананні, цяжка параўнаць з жахамі вайны і калонамі расейскіх танкаў, што ідуць ва Украіну. Аднак у дэмакратычных сілаў дый у грамадскай супольнасці быў ні адзін год, каб дамагчыся іхнага вызвалення. Некаторыя выйшлі на волю. Яшчэ сямёра застаюцца за кратамі. Чаму?

ЛЮДМІЛА ГРАЗНОВА, ПРАВААБАРОНЦА:
«Мы не змаглі іх ператварыць у гэткіх маральных лідараў. То бок тая кампанія, што магла б быць зробленая, яна рэальна не адбылася. І асобныя нейкія спробы жонак ды матак узняць іхнае імя не далі чаканага выніку».

Самы вядомы з іх – кандыдат на прэзідэнта ў 2010 годзе Мікола Статкевіч – за кратамі ўжо трэці год. І калі нічога не зменіцца ці Аляксандр Лукашэнка не злітасцівіцца – яшчэ столькі ж там і застанецца. Прычым ад пацяплення адносінаў паміж Менскам і Бруселем умовы ў палітвязняў не паляпшаюцца.

МАРЫНА АДАМОВІЧ, ЖОНКА МІКОЛЫ СТАТКЕВІЧА:
«Апошнія восем месяцаў практычна ён ужо знаходзіцца ў адзіночцы. Ён увесь час адзін у камеры, з паўтарыгадзінным шпацырам… і ўсё».

Але пакуты палітвязняў ды іхных сем’яў ніяк не адбіліся на іміджавым трыумфе кіраўніка Беларусі. Акрамя адкрытых размоваў з польскімі палітыкамі ў Менску, які Лукашэнка прапаноўваў як нейтральную пляцоўку для размоваў пра ўкраінскі крызіс, упершыню за доўгі час прыязджаюць не толькі старыя сябры, але і еўрапейскія лідары.

ВАДЗІМ МАЖЭЙКА, «ЛІБЕРАЛЬНЫ КЛУБ»:
«То бок Лукашэнка – на роўных: такі ж прэзідэнт, як іншыя прэзідэнты. У прынцыпе, тое, пра што беларуская дыпламатыя апошнія гады і казала – мы хочам быць на роўных, каб нас не дыскрымінавалі, каб з намі размаўлялі як з роўным еўрапейскім партнёрам – у прынцыпе, гэтых мэтаў Лукашэнка так ці інакш дасягае».

І гэткім чынам робіцца адзіным, для каго ўкраінскі крызіс прынёс хоць нейкія выгоды. Прычым за гэта ён не саступіў ні на крок са сваіх ранейшых пазіцыяў.

Усевалад Шлыкаў, «Аб’ектыў», Белсат ТВ