Праваабаронцы: У Беларусі з'явіўся новы палітычны вязень – Юрый Рубцоў
21 снежня 2014 года стала вядома аб накіраванні гомельскага грамадскага актывіста Юрыя Рубцова ў выпраўленчую ўстанову адкрытага тыпу №7 у вёсцы Куплін Пружанскага раёна Берасцейскай вобласці.
6 кастрычніка гэтага года Юрый Рубцоў быў асуджаны судом Цэнтральнага раёна Менска паводле арт.391 Крымінальнага кодэкса (абраза суддзі або народнага засядацеля) на 1 год і 6 месяцаў абмежавання волі з накіраваннем ва ўстанову адкрытага тыпу.
Крымінальны пераслед Юрыя Рубцова звязаны з яго адвольным затрыманнем 28 красавіка 2014 года падчас санкцыянаванага мірнага сходу «Чарнобыльскі шлях» за цішотку з надпісам «Лукашэнка, сыходзь!» і асуджэннем на 25 дзён адміністрацыйнага арышту суддзёй суда Савецкага раёна Менска Кірылам Палулехам. Згодна з выстаўленым Юрыю Рубцову абвінавачваннем, падчас судовага разбору ён дапусціў абразлівыя выказванні ў адрас суддзі. Важна адзначыць, што ў суд Юрый Рубцоў быў дастаўлены аголены па пояс, у выглядзе, які абражаў яго чалавечую годнасць, а суддзя пры гэтым не прыняў ніякіх мер, накіраваных на абарону яго правоў, а таксама на яго просьбы выдаць яму акуляры для азнаямлення з матэрыяламі справы.
Дзеянні суддзі відавочна супярэчылі Кодэксу Рэспублікі Беларусь «Аб судаўладкаванні і статусе суддзяў», а таксама Кодэкса гонару суддзі Рэспублікі Беларусь. У сувязі з грубым парушэннем сваіх правоў Юрый Рубцоў выказаў цалкам абгрунтаваную незадаволенасць і пратэст, назваўшы такія судовыя працэсы «судзілішчам», а суддзяў, які выносяць незаконныя судовыя пастановы, «падонкамі». Гэтыя словы былі інтэрпрэтаваныя як выказванні, накіраваныя персанальна ў адрас суддзі Палулеха, пры гэтым заўвагі Юрыя Рубцова да пратакола судовага пасяджэння, накіраваныя ім у суд, былі адхіленыя гэтым жа суддзёй, як неабгрунтаваныя.
У аснову вынесенага прысуду былі пакладзеныя выключна паказанні супрацоўнікаў міліцыі (у тым ліку тых, якія «сведчылі» на працэсе 28 красавіка), сакратара судовага паседжання і самога суддзі К.Палулеха. Ні падчас папярэдняга следства, ні падчас судовага разбору гэтай крымінальнай справы не быў дапытаны сведка, адвакат Юрыя Рубцова, які ўдзельнічаў у разглядзе справы 28 красавіка ў якасці яго абаронцы.
Ніякіх працэсуальных перашкод да допыту адваката ў якасці сведкі згодна з дзеючым Крымінальна-працэсуальным заканадаўствам не было.
Праваабаронцы мяркуюць, што следства і судовы працэс у справе Юрыя Рубцова насілі абвінаваўчы характар, не былі прынятыя меры для ўсебаковага і бесстаронняга разгляду, што з\’яўляецца адным з неабходных чыннікаў справядлівага судовага разбору.
Праваабарончы цэнтр «Вясна» і РГА «Беларускі Беларускі Хельсінкскі камітэт» заяўляюць:
Пераслед Юрыя Рубцова цалкам звязаны з незаконнай практыкай адвольных затрыманняў і з\’яўляецца палітычна матываваным;
Судовы працэс над Юрыем Рубцова не адпавядаў асноўным прынцыпам справядлівага судовага разбору;
Абмежаванне волі Юрыя Рубцова ў папраўчай установе адкрытага тыпу дае падставы кваліфікаваць яго як палітычнага зняволенага.
Праваабарончы цэнтр «Вясна» і РГА «Беларускі Хельсінкскі камітэт» патрабуюць вызвалення Юрыя Рубцова і перагляду справы ў адпаведнасці з прынцыпамі справядлівага судовага разбору.