"Рэжым баіцца народа больш, чым страты незалежнасці"
Рада БНК патрабуе неадкладнага вызвалення Ўладзіміра Някляева і спынення рэпрэсій супраць патрыётаў.
Аб гэтым гаворыцца ў заяве Рады ў сувязі з арыштам Уладзіміра Някляева.
«Рэжым арыштаваў на 7 дзён сябра Рады Беларускага Нацыянальнага Кангрэса, экс-кандыдата ў прэзідэнты і выбітнага паэта Уладзіміра Някляева. Нагодай для арышта стаў удзел Някляева 8 верасня ў Акцыі папярэджання супраць вайсковых вучэнняў «Захад-2017».
Сілавыя структуры рэжыма эфектыўныя толькі супраць уласнага народа і няздатныя супрацьстаяць пагрозе незалежнасці з боку расійскіх войскаў. Таму рэжым спачатку даў магчымасць патрыётам правесці Акцыю папярэджання і нават адклаў дзеля гэтага выкананне адміністрацыйных арыштаў для некаторых яе арганізатараў.
Пасля Акцыі папярэджання былі агучаны планы БНК правесці 21 кастрычніка «Марш абураных беларусаў 2.0». Рэжым запанікаваў і аднавіў рэпрэсіі супраць патрыятычных лідараў. Улада ў чарговы раз паказала, што баіцца свайго народа больш, чым страты незалежнасці і варожай акупацыі.
Рада БНК патрабуе неадкладнага вызвалення Ўладзіміра Някляева і спынення рэпрэсій супраць патрыётаў. Мы звяртаемся да беларускага грамадства з заклікам да салідарнасці і заяўляем пра сваю рашучасць годна і моцна правесці «Марш абураных беларусаў 2.0».
Уладу — народу!
Жыве Беларусь!»
