У Бярозе забаранілі пікет салідарнасці з палітвязнямі

Бярозаўскі райвыканкам забараніў пікет, бо ўважае салідарнасць з палітвязнямі экстрэмізмам.

Бярозаўскі райвыканкам адмовіў праваабаронцам у задавольванні заяўкі на правядзенне пікету салідарнасці з палітвязнямі, які планаваўся на 4 жніўня – у Міжнародны дзень салідарнасці з беларускай грамадзянскай супольнасцю, паведамляе ПЦ «Вясна».

У адмове за подпісам намесніка старшыні райвыканкама Яўгена Тарасюка паказваецца, што ў адпаведнасці з Законам РБ ад 4 студзеня 2007 года «Аб супрацьдзеянні экстрэмізму» дзяржаўныя органы абавязаны прымаць меры, накіраваныя на выяўленне і ліквідацыю прычын і ўмоў, якія садзейнічаюць экстрэмісцкай дзейнасці. Паколькі Мікалай Статкевіч, Мікалай Дзядок, Ігар Аліневіч, Арцём Пракапенка, Яўген Васьковіч і Юры Рубцоўпакараныя па агульнакрымінальнай артыкулах, салідарнасць з імі падчас пікету з\’яўляецца прапагандай экстрэмісцкай дзейнасці. Гэта і стала прычынай адмовы ў правядзенні масавага мерапрыемства.

Нагадаем, што гэта была не першая спроба бярозаўскіх праваабаронцаў правесці публічнае мерапрыемства з мэтай прыцягнуць увагу да існавання ў Беларусі палітычных зняволеных, але кожны раз яны атрымлівалі ад мясцовага райвыканкама адмову. Заяўкі на пікеты 4 жніўня яны падавалі ўжо чацвёрты год запар. Для іх гэта асаблівы дзень, бо менавіта ў гэтую дату ў 2011 годзе быў арыштаваны іх калега Алесь Бяляцкі – кіраўнік Праваабарончага цэнтра «Вясна». Нягледзячы на вызваленне Бяляцкага, праваабаронцы з Бярозы не збіраюцца адмаўляцца ад правядзення Дня салідарнасці, пакуль за кратамі знаходзяцца палітвязні.