Пра міратворчы кантынгент

З ліста ад 25.05.2022

Пра мэтазгоднасць увядзення ва Украіну міратворчага кантынгенту:

«[…] дазволіць увесці міратворчыя войскі на Валынь, як мінімум, каб забяспечыць бяспеку камунікацый Украіны з Захадам. І прадухіліць пагрозу нападу з раёна Брэст- Маларыта. Гэта дазволіць вызваліць размешчаныя насупраць гэтага раёна ўкраінскія войскі, каб адправіць іх на Усход. Для нас жа галоўнае тое, што гэта рэзка знізіць імавернасць уцягвання Беларусі ў вайну.»

* * *

«Зараз, як я бачу, у афіцыёзе самым папулярным словам робіцца «імпартазамяшчэнне». Але праблема ў тым, што амаль усе прарыўныя сучасныя тэхналогіі патрабуюць выкарыстання элементаў сучасных інфармацыйных тэхналогій з адпаведнай элементнай базай. А вырабляць гэтую самую элементную базу ў «саюзнай дзяржаве» — нерэальная задача. Яшчэ пры СССР адставанне ад перадавых у галіне мікраэлектронікі краін адмыслоўцы ацэньвалі ў дзесяцігоддзі. А то і словам «назаўсёды». Але ж тады хаця б спробы дагнаць былі — даследавалі «варожыя» мікрасхемы на мікраскопам, здымаючы іх слой за слоем. А пасля распаду СССР 30 гадоў нават такіх «навуковых даследванняў» не вялі. Куды ўжо цяпер.»

Мікалай Статкевіч, Гомель, СІЗА №3

Паводле слоў спадарыні Марыны Адамовіч, лісты ад Мікалая ідуць няроўна, іншы раз – «пачкамі». І, канешне, апошнім часам Статкевіч, якога зараз утрымліваюць у СІЗА Гомеля, шмат разважае пра падзеі ва Украіне.