Дзякуй, дарагія сябры!

Марына Адамовіч праз наш сайт звярнулася з падзякай да ўсіх, хто павіншаваў іх з Мікалаем Статкевічам са шлюбам, які быў зарэгістраваны ў Шклове 20 снежня.

 

Дарагія сябры!

Шчыра дзякую ўсім, хто павіншаваў нас са шлюбам, які быў урэшце зарэгістраваны 20 снежня, пасля амаль што году самых розных перашкод. Я лічу, што гэта сталася магчымым дзякуючы вам, дарагія сябры, вашай падтрымцы і неабыякавасці!

Я ўдзячная журналістам дэмакратычных медыяў, якія не далі беларускаму грамадству забыцца на тых, хто за кратамі; якія агучвалі тое, што ўлады хацелі б схаваць за калючым дротам.

Вялізарная падзяка праваабаронцам, якія ўвесь гэты цяжкі год былі побач з намі, дапамагалі і падтрымлівалі нас.

Нізка кланяюся ўсім тым неабыякавым людзям, якія выходзілі на акцыі пратэста, якія з годнасцю і гонарам змагаліся за сваё права на волю. Асаблівая ўдзячнасць тым, хто, ахвяруючы ўласнай свабодай, змагаўся і змагаецца за вызваленне палітвязняў.

Я шчаслівая, што гэты год прынёс мне знаёмства і сяброўства з дзесяткамі цудоўных людзей, з якімі, пры меньш трагічных абставінах, мы, хутчэй за ўсё, не сустрэліся б.

Хачу перадаць вам таксама словы шчырай  ўдзячнасці і захаплення ад Мікалая Статкевіча ўсім тым, хто змагаецца за свабоду нашай Радзімы, паплечнікам і неабыякавым людзям, якія сваімі лістамі, паштоўкамі, словамі падтрымкі дапамагаюць яму у вязніцы захаваць моц духу і веру ў выбраны шлях.

Для мяне сталася прыемнай нечаканасцю тое, колькі людзей сачылі і хваляваліся за нас, радаваліся разам з намі.

ШЧЫРА ВАМ ДЗЯКУЮ!!!

НЯХАЙ НАДЫХОДЗЯЧЫ ГОД ПРЫНЯСЕ Ў ВАША ЖЫЦЦЁ ТОЛЬКІ ДОБРЫЯ ПЕРАМЕНЫ!

БОЖА! БЛАСЛАВІ БЕЛАРУСЬ!