У Менск прыбыў дакладчык Еўрапарламента
18 сакавіка пачаўся візіт у Беларусь дакладчыка Еўрапарламента па Беларусі Юстаса Палецкіса.
Як паведамілі «Радыё Свабода» ў літоўскім бюро еўрапарламентара, у яго запланаваны шэраг сустрэч з прадстаўнікамі ўладаў і апазіцыі. 18 сакавіка ён сустракаецца з лідарам партыі «Справядлівы свет» Сяргеем Калякіным і адным з лідараў БХД Віталём Рымашэўскім. Візіт будзе доўжыцца да 21 сакавіка.
Раней еўрапарламентар распавёў, што займаецца падрыхтоўкай даклада аб адносінах паміж ЕЗ і Беларуссю, які будзе абмяркоўвацца вясной у камітэтах Еўрапарламента, а галасаванне плануецца правесці восенню.
«Было вельмі шмат рэзалюцый па канкрэтных пытаннях: парушэнні правоў чалавека, арышты, непразрыстыя выбары і гэтак далей. А вось такога абагульняючага дакумента аб адносінах наогул не было. Таму гэтая неабходнасць наспела. Гэта будзе агульны дакумент Еўрапарламента, і ў фракцыі сацыялістаў я прызначаны галоўным дакладчыкам», – сказаў еўрапарламентар.